Co pon ins evitar nauschas surpraisas?
Bloccai l'access als numers da 090x
La meglra protecziun cunter abus en il sectur dals numers da 090x è d'impedir che colliaziuns a tals numers pon vegnir fatgs cun Voss telefon. Mintga purschidra sto dar a sias clientas ed a ses clients la pussaivladad da bloccar tut ils numers da 090x u las singulas categorias (p.ex. 0901 e 0906). La bloccada sto pudair vegnir activada u deactivada da Vus en moda simpla e gratuita. Vossa purschidra As sto infurmar davart las pussaivladads da bloccar, cura che Vus faschais in nov contract e suenter almain ina giada per onn. Per giuvenils sut 16 onns ston ils numers da 090x esser bloccads sco standard. Cun excepziun da l'access al divertiment da persunas creschidas (0906) pon las ulteriuras purschidas (0900 und 0901) vegnir messas a disposiziun cun il consentiment d'ina persuna responsabla per l'educaziun.
Faschai attenziun, tgi che dovra Voss apparat.
Sajas attentas ed attents!
Adempli las invitaziuns da persunas estras da cumponer in numer da 090x – sche insumma – mo cun precauziun. Cunzunt, sch'i duai esser urgent u sch'in donn smanatschant duai vegnir impedì. Pretensiuns che telefonats a numers da 090x sajan p.ex. gratuits, èn per regla fauss.
As infurmai davart ils pretschs
Sch'il pretsch na vegn betg communitgà ensemen cun il numer, pudais Vus vegnir a savair quel da Vossa purschidra. Annunziai il cas al UFCOM.
Attenziun cun gieus da dumondas: la taxa fundamentala e/u il pretsch per minuta pajais Vus per mintga telefonat resp. per mintga emprova da telefonar. Quai vala perfin, sche Vus vegnis mo colliads cun ina infurmaziun automatisada u cun in respundider.