Communicaziun mobila: evoluziun vers 5G
La quantitad da datas che nus transferin sur la rait da la telefonia mobila sa dublegia mintga onn. Cun l'introducziun da la terza generaziun da telefonia mobila (3G, UMTS) amez ils onns 2000 e da la quarta generaziun (4G, LTE) a partir da l'onn 2012 ha il diever fin ussa pudì vegnir cuvrì. Ussa arrivan questas tecnologias dentant a lur cunfins. L'introducziun da 5G vegn dentant a procurar per in augment considerabel da las capacitads da transmetter datas.
Raits da 5G
Raits da 5G èn ina revoluziun en il sectur da la communicaziun mobila. Ellas avran numnadamain la porta a novs champs d'applicaziun, cunzunt en il sectur da l'internet da las chaussas (IoT), da la communicaziun tranter las maschinas (M2M), da las applicaziuns da bindel ultralad, dals autos autoguidads e.u.v.
En cumparegliaziun cun ils standards actuals da la telefonia mobila da 3G e 4G porscha il 5G cunzunt tar il svilup da novas tecnologias avantatgs decisivs.
Ils avantatgs da 5G
- Il temp da reacziun (latenza) da main ch'ina millisecunda è 30 fin 50 giadas pli curt che tar 4G.
- La rata da transmissiun da datas da 10 gbit/s è 100 giadas pli gronda che tar 4G.
- I pon vegnir colliads il medem mument 100 giadas dapli apparats finals, uschia ch'il dumber dals objects colliads per km2 s'augmenta sin in milliun.
Las fasas da l'introducziun da 5G
- November 2017: Il Cussegl federal reserva ils bindels da frequenza (700 MHz e 3,5 GHz) per la telefonia mobila.
- December 2017: In'emprima versiun dals standards per 5G è disponibla.
- En il decurs da l'onn 2018: Ils emprimas equipaments per 5G stattan a disposiziun.
- Favrer 2019: La cumissiun da communicaziun ComCom surdat las novas frequenzas a las gestiunarias da telefonia mobila. Il bindel da 3,5 GHz serva sco bindel da partenza per l'implementaziun da 5G.
- L'onn 2019 cumenza 5G en Svizra
Il fegl d'infurmaziun qua sutvart dat ina survista davart la tecnologia 5G.