Co reagir?
L'import sin Voss quint da telefon As surprenda e Vus vesais telefonats ad in u plirs numers da 090x? Il pretsch per telefons a numers da 090x è per exempel pli aut che spetgà u Vus n'eras insumma betg conscienta u conscient che telefonats a numers da 090x èn vegnids fatgs?
- Infurmai svelt Voss purschidra.
- Envers Vossa purschidra pudais Vus contestar l'import ch'As vegn mess a quint per il telefonat al numer 090x. Faschai ina communicaziun en scrit. Pajai la differenza da l'import a temp. En quest cas n'As dastga la purschidra ni bloccar ni disdir l'abunament fin a la terminaziun da la fatschenta. Ella As dastga dentant impedir l'access als numers da 090x.
- As drizzai al post da mediaziun per telecommunicaziun (ombudscom). Sche Vus na vegnis betg d'accord cun Vossa purschidra u la titulara dal numer da 090x, po ombudscom As gidar da resolver la fatschenta senza procedura giudiziala. Per che ombudscom possia daventar activ, sto in'emprova da sa cunvegnir esser vegnida prendida en mira.
- Infurmai il UFCOM respectivamain las autoritads cumpetentas (p.ex. il Secretariat da stadi per l'economia SECO en cas da cumportaments da fatschenta illoials u las autoritads da persecuziun penala en cas d'in suspect da cumportament relevant per il dretg penal sco per exempel engion).
Per giuditgar in cas èn il UFCOM ed er autras autoritads dependents d'indicaziuns uschè cumplettas e detagliadas sco pussaivel. Ans tramettai documents dals quals i resulta cura, nua e co ch'il numer da 090x è vegnì publitgà (p.ex. inserat original, document stampà dal monitur). Descrivai uschè detaglià sco pussaivel, tge ch'è capità (p.ex. nagina u faussa annunzia da pretsch, faussa publicaziun dal numer 090x). - Ultra da quai pudais Vus instradar ina procedura da dretg civil e da dretg penal cunter la titulara u il titular dal numer. En quest cas As vegni recumandà da consultar las enconuschientschas specificas d'ina advocata u d'in advocat respectivamain d'in servetsch da cussegliaziun giuridica.