L'autezza da la taxa ed il quint
Autezza da la taxa
- Per chasadas privatas importa la taxa 335 francs per onn
Il quint
- La Serafe incassescha la taxa per las chasadas privatas.
- Sin il quint figureschan ils nums da tut las persunas maiorennas da la chasada che stattan bunas solidaricamain per l'import mess a quint.
- La chasada è vegnida attribuida ad ina da dudesch gruppas da rendaquint tenor il princip da la casualitad. Tgi ch'è en l'emprima gruppa, survegn il schaner in quint annual da 335 francs. Tgi che appartegna a la segunda gruppa, survegn il quint annual il favrer ed uschia vinavant.
- Sch'in sbagl vegn constatà en las datas d'adressas, sto quest sbagl vegnir annunzià directamain a la controlla d'abitantas e d'abitants da la vischnanca u dal chantun u a la Serafe.
- Ils quints pon vegnir pajads sco quint annual u quint per 3 mais, sco quint sin palpiri, sco ebill (quint electronic) u en procedura da debitaziun directa. In quint da 3 mais sin palpiri custa pervia dals custs administrativs pli gronds 2 francs supplementars.
La Lescha federala davart radio e televisiun en furma concisa (PDF, 141 kB, 04-08-2022)
Ina survista da las tariffas per radio e televisiun (PDF, 310 kB, 04-08-2022)[DP1] - Il quint vegn facturà durant l'emprim mais da la perioda da quint. Il quint annual sto vegnir pajà entaifer 60 dis, il quint da 3 mais entaifer 30 dis. Il termin da surannaziun importa 5 onns.
Responsabladad solidara da las cunabitantas e dals cunabitants
- Tut las persunas maiorennas en la medema chasada stattan bunas solidaricamain per la taxa da radio e televisiun. Sin mintga quint figureschan tut las persunas maiorennas d'ina chasada il mument da la facturaziun.
- La Serafe po pretender da mintga singula persuna, ch'è menziunada sin il quint, da pajar l'entir import, totalmain natiralmain mo ina giada.
- La repartiziun interna è chaussa da las commembras e dals commembers maiorens da la chasada ed è suttamess al dretg privat.
- En il bloc d'adressa dal quint da la taxa èn inditgadas separadamain las persunas maiorennas fin ad ina grondezza da chasada da trais persunas creschidas.
- En cas da chasadas cun da dapli che trais persunas maiorennas vegn inditgà il num d'ina persuna creschida en il bloc d'adressa cun l'indizi «ulteriuras persunas obligadas da pajar la taxa».
Organ d'incassament
La SERAFE SA (Serafe) è l'organ d'incassament svizzer per la taxa da radio e televisiun ed ina filiala da la Secon SA cun sedia a Pfäffikon (SZ). Per incumbensa da la Confederaziun incassescha la Serafe la nova taxa per las chasadas dapi il 1. da schaner 2019. Suenter ina procedura da submissiun publica ha il Departament federal per ambient, traffic, energia e communicaziun (DATEC) surdà ad ella il mandat ils 10 da mars 2017 per il temp fin ils 31 da december 2025.
Indicaziuns da contact Serafe:
SERAFE SA
Chascha postala
8010 Zürich
Tel. 058 201 31 67
Contact Serafe
www.serafe.ch
Acquisiziun da las datas
- Ils chantuns e las vischnancas furneschan las datas da las chasadas privatas a la Serafe.
- Per incassar las taxas da las chasadas survegn la Serafe las datas necessarias dals registers d'abitantas e d'abitants directamain da mintga uffizi d'abitantas e d'abitants sur la plattafurma d'informatica e da communicaziun centrala da la Confederaziun (Sedex).
- Las datas dal persunal diplomatic exteriur survegn la Serafe directamain sur il sistem d'infurmaziun Ordipro dal Departament federal d'affars exteriurs (DFAE).
- Basas legalas: Artitgel 69g da la Lescha federala davart radio e televisiun (LRTV; CS 784.40) ed artitgel 67 e 67a da l'Ordinaziun davart radio e televisiun (ORTV; CS 784.401)
Informationen zur Übermittlung der Daten