Numers da telefon che cumenzan cun 0900, 0901 u 0906
Quests «numers da servetschs cun plivalur» pussibiliteschan da pajar tscherts servetschs en moda nuncumplitgada. Tar il diever da quests numers vegnan las prescripziuns vertentas il pli savens observadas. Tuttina ston ins far attenziun, sch'ins cumpona tals numers: Las taxas da telefon engrevgiadas èn mintgatant fitg autas ed i dat er abus.
Las trais categorias da numers da 090x:
- 0900: Business, marketing, exempels: helpdesk, vendita e reservaziun da bigliets, vendita d'auters servetschs u products
- 0901: divertiment, gieus, response, exempels: oroscop, intermediaziun da partenaris, concurrenzas, enquistas (uschenumnads votings)
- 0906: divertiment da persunas creschidas, exempels: purschidas e servetschs da cuntegn erotic u pornografic.
Ils numers dastgan unicamain vegnir duvrads per servetschs da lur categoria.
Numers da 090x vegnan er duvrads sco numers da faxs.
Tgi porscha quests servetschs?
Il UFCOM attribuescha in numer da 090x a mintga persuna u mintga interpresa che fa ina dumonda correspundenta e che vul prestar in servetsch sur quest numer.
Il UFCOM publitgescha num ed adressa da las titularas e dals titulars da tals numers sin la pagina d'internet.
Titularas e titulars cun sedia a l'exteriur ston inditgar in'adressa da correspundenza en Svizra.