Pretschs, quint e prescripziuns
L'import ch'As vegn mess a quint per telefonat sin in numer da 090x, cuntegna tant la taxa per la colliaziun sco tala («il telefonar») sco er per il servetsch tratg a niz. Questas cumponentas na vegnan betg decleradas separadamain.
Telefonats sin in numer da 090x pon vegnir mess a quint sco suonda:
- cun ina taxa fundamentala
Exempel: 10 francs per telefon u per fax - cun in pretsch per minuta
Exempel: 5 francs per minuta - cun ina taxa fundamentala che vegn debitada directamain, suenter che la colliaziun è stabilida, e cumbinada cun in pretsch per mintga minuta che suonda
Exempel: 35 francs per in telefonat che dura 5 minutas ad in numer cun ina taxa fundamentala da 10 francs ed in pretsch per minuta da 5 francs (10 francs + 5 francs x 5 min. = 35 francs)
Durant il telefonat pon ultra da quai resultar taxas fixas. Er il pretsch per minuta po sa midar. Exempels:
- Midada dal pretsch per minuta suenter in tschert temp (las emprimas 5 minutas èn pli favuraivlas che las minutas suandantas)
- Taxas fixas che vegnan messas a quint mintga 10 minutas.
I valan ils suandants pretschs maximals:
- 100 francs per las taxas fundamentalas
- 10 francs per minuta
- maximalmain 400 francs per colliaziun
Quint
Servetschs cun valur agiuntada ston vegnir menziunads separadamain sin il quint da telefon. Tar colliaziuns da presadi pon las datas relevantas per metter a quint in servetsch cun plivalur vegnir pretendidas tar la purschidra, quai sin dumonda.
Prescripziuns per numers da 090x:
- Mintga giada ch'in numer vegn communitgà a bucca u en scrit, sto vegnir inditgà er l'indicatur (emprimas quatter cifras), e quai en moda separada cleramain da las ulteriuras cifras dal numer.
Exempels:
0900 275 511 = endretg
09 00275 511 u 0900275511 = fauss - Mintga giada ch'in numer da 090x vegn communitgà a bucca (p.ex. en il radio u en la televisiun), sto il pretsch vegnir communitgà cler e net.
- Mintga giada ch'in numer da 090x vegn communitgà en scrit, p.ex. en ina reclama u en inserat pitschen, ston las infurmaziuns da pretsch vegnir communitgadas publicamain almain en la medema grondezza da la scrittira sco il numer, e quai bain visiblas e legiblas en proxima vischinanza dal numer.
- Sche la taxa fundamentala u il pretsch per minuta surpassa 2 francs, sto il pretsch vegnir annunzià en moda clera, gratuita ed almain en la lingua da purschida dals servetschs, uschespert che la colliaziun è vegnida fatga.
- Sche la taxa fundamentala surpassa 10 francs u il pretsch per minuta 5 francs, na dastga nagut vegnir debità a la clienta u al client, sche quella u quel n'ha betg confermà cun in signal spezial d'acceptar la purschida.
- Sch'il pretsch per minuta mida durant la colliaziun u sch'i resultan taxas fixas, sto la midada u la taxa vegnir annunziada directamain, avant ch'ella vegn applitgada ed independentamain da sia autezza. Ultra da quai sto vegnir fatga ina conferma explicita da la purschida, sch'ils imports minimals previs per quai vegnan surpassads.
- Ils pretschs na dastgan betg surpassar las limitas superiuras ch'il Cussegl federal ha fixà.
- Las titularas ed ils titulars da numers da 0906 ston garantir, che persunas sut 16 onns n'han nagin access a cuntegns pornografics. Per participantas e participants (utilisadras ed utilisaders da la colliaziun) sut 16 onns blocheschan las purschidras l'access d'emprim ennà.
- Ils servetschs purschids sur ils numers da 090x ston tut en tut correspunder a las normas da l'urden giuridic svizzer, p.ex. dal dretg da loialitad, dretg da contract u da dretg penal. Il giudicament dal cuntegn fan las autoritads resp. las dretgiras ch'en mintgamai responsablas, betg il UFCOM.