Publitgà sin il 27 schaner 2026
Roaming
A l'exteriur poi daventar char, sche Vus faschais e retschavais telefonats cun Voss telefonin, tramettais e retschavais SMS/MMS u navigais en l'internet.
La publicaziun dals 10 da fanadur 2024 ha stuì vegnir reelavurada pervi da cifras divergentas da quellas da la publicaziun da l’onn passà. Pertutgadas èn stadas las statisticas davart la svieuta ed il volumen dals onns 2021-23. Durant la reelavuraziun è, ultra da quai, vegnì scuvert e curregì in sbagl en las datas da l’onn 2023. Las datas ch’èn ussa publitgadas, cuntegnan las valurs correctas.
Tge signifitga roaming internaziunal?
Sut «roaming internaziunal" chapeschan ins il diever d'in apparat cun ina carta SIM a l'exteriur. Uschia po ina clienta u in client telefonar cun ses apparat, trametter e retschaiver SMS u navigar en l'internet, cura ch'ella u el è a l'exteriur. Dependent dal pajais, da l'abunament e dal diever da l'apparat po la clienta u il client a chasa far l'enconuschientscha d'ina nauscha surpraisa en furma d'in aut quint.
Pertge è il roaming char?
Las purschidras svizras da telefonia mobila han mo en Svizra in'atgna rait da telefonia mobila. Per che las clientas ed ils clients possian duvrar lur apparat er a l'exteriur, ston las purschidras svizras da telefonia mobila far ina cunvegna da roaming cun purschidras estras da telefonia mobila. Per il diever da la rait estra ston las purschidras svizras da telefonia mobila per part pajar bler a las purschidras estras da telefonia mobila. Quests custs vegnan indossads da las purschidras svizras da telefonia mobila a lur clientas ed a lur clients cun pretender las tariffas da roaming. Mintgatant han las purschidras da telefonia mobila er simplamain pli autas marschas.
Pertge pajan burgaisas e burgais da la UE u dal SEE damain?
Sche burgaisas e burgais da la UE u dal SEE viagian entaifer ils stadis da la UE e dal SEE, alura vala il uschenumnà «roam-like-at-home» (RLAH). Quest princip signifitga che burgaisas e burgais da la UE e dal SEE pon duvrar lur telefonin sut las medemas cundiziuns ordaifer ils pajais da la UE e dal SEE sco a chasa dapi ils 15 da zercladur 2017. Per detagls guardar URL:
https://europa.eu/youreurope/citizens/consumers/internet-telecoms/mobile-roaming-costs/index_de.htm (stan 1. da mars 2021)Tge vala per la Svizra?
Dapi l'entrada en vigur da la Lescha da telecommunicaziun revedida il 1. da schaner 2021 ha la Svizra ina basa per la regulaziun dals servetschs da roaming (cf. art. 12abis LTC). En l'Ordinaziun davart ils servetschs da telecommunicaziun (cf. art. 10a – 10d OST) vegn tranter auter reglà concretamain, che
- il consum da roaming sto vegnir mess a quint exactamain per la secunda resp. per kilobyte,
- i sto vegnir fixada ina limita dals custs per il roaming tar la conclusiun dal contract (per evitar uschenumnads bill-shocks), la quala po er vegnir adattada da tut temp dals clients existents,
- il dabun d'ina opziun da roaming cumprada na dastga betg scrudar durant 12 mais,
- il cumenzament d'ina opziun da roaming dastga vegnir elegì libramain,
- l'access a servetschs da roaming è bloccà sco standard en aviuns e sin bastiments e po vegnir activà e deactivà independentamain dals ulteriurs servetschs da roaming.
Er exista da nov la pussaivladad da regular ils pretschs finals per la clientella, sch'ils pretschs per la prestaziun preliminara èn reglads cun ina cunvegna internaziunala. Actualmain n'existan dentant naginas cunvegnas che permettessan ina tala regulaziun.
- Metter il telefonin u auters apparats cun la carta SIM svizra en il modus aviun. Telefonar il medem mument sur WLAN cun applicaziuns sco Threema, Telegram, WhatsApp u Skype.
- Avant la dimora a l'exteriur chargiar giu offline chartas geograficas da la regiun da viadi en Svizra u a l'exteriur sur WLAN. A l'exteriur pon ins duvrar la charta cun GPS activà (lieu) en il modus aviun.
- Duvrar alternativas (p.ex. cartas SIM da prepaid d'in purschider local)
- Purschidas opziunalas, duvrar uschenumnads pachets da roaming da las purschidras (il meglier s'infurmar avant il cumenzament dal viadi tar la purschidra)
- Duvrar pachets da purschidas, sco In One u Go World, cun unitads inclusivas.
- Telefonar sur WLAN
Pretsch per il respundider
Cun tadlar il respundider (p.ex. combox da Swisscom Mobile, Salt Box u sunrise mailbox) dal lieu a l'exteriur pudessan resultar taxas da roaming. Sche Vus na deactivais betg il sviament dal respundider avant il cumenzament dal viadi, exista il privel che Vus stuais pajar taxas supplementaras per il sviament dal discurs a l'exteriur. Infurmaziuns davart la configuraziun dal respundider u da las taxas As po dar la purschidra svizra da telefonia mobila respectiva.
Co che Vus pudais evitar il roaming en territoris da cunfin
En las regiuns da cunfin da la Svizra èsi pervia da las caracteristicas da derasaziun fisicalas da las frequenzas da radiofonia, che na sa ferman betg al cunfin naziunal, pussaivel ch'in apparat cun ina carta SIM svizra (smartphone, tablet, laptop e.u.v.) mida en ina rait da telefonia mobila estra. Per evitar auts custs pervia d'in tal roaming nunvoluntar en raits estras, duessan las clientas ed ils clients bloccar la funcziun «roaming» en las configuraziuns.
Cun bloccar la funcziun da roaming vegn da princip evità in roaming nunvoluntar. Dependent dal gestiunari respectiv po per exempel il roaming da datas gia esser bloccà sco standard tar l'acquist d'in abunament resp. d'ina purschida da prepaid.
Sch'i As spetga suenter las vacanzas ina nauscha surpraisa en furma d'in quint en la chascha da brevs – malgrà tutta precauziun – vegni recumandà da discurrer cun la telefonia mobila respectiva u d'instradar ina procedura da mediaziun tar Ombudscom (https://de.ombudscom.ch/).
Consigli utili per viaggiare all'estero
In simpel tool per chattar ora, sch'ins duai cumprar opziuns per in viadi planisà a l'exteriur resp. ina survista da las opziuns ch'i dat, porschan moneyland.ch e dschungelkompass.ch.
Ulteriurs servetschs da cumparegliaziun davart ils servetschs da telecom chattais Vus en l'internet.