Ruaus da telefonats da reclama nungiavischads
Telefonats da reclama nungiavischads èn malgrà prescripziuns pli rigurusas anc adina fitg derasads e las persunas pertutgadas als resentan savens sco mulestus. I na dat nagina protecziun absoluta cunter marketing al telefon nungiavischà. Dentant pon intginas mesiras gidar da reducir ils disturbis ad in minimum.
Ils purschiders èn obligads da metter a disposiziun a lur clientas e lur clients in med cunter telefonats da reclama illoials ed uschia illegals. Quai dastgass per regla esser in filter che las clientas ed ils clients pon activar sezzas e sezs, sch'il purschider n'ha betg activà il filter sco standard. Ils purschiders ston infurmar lur clientas e lur clients davart la purschida sco er davart ses avantatgs ed en spezial er davart ses dischavantatgs (p.ex. bloccadas che pon capitar per sbagl). Il filter sto pudair vegnir activà e deactivà gratuitamain da tut temp.
Resguardai per plaschair ch'ils filters pon porscher mo fin ad in tschert grad ina protecziun da telefonats da reclama nungiavischads ed ils telefonats disturbants na vegnan perquai betg a svanir dal tuttafatg. En spezial engrevgescha la circumstanza ch'in numer da telefon po vegnir falsifitgà u manipulà tecnicamain en moda relativamain simpla (uschenumnà spoofing), il cumbat cunter ils telefonats da reclama illoials.
Medemamain n'ha betg mintga purschider a disposiziun las medemas pussaivladads. Las purschidas da filter pon perquai esser differentas. Vus As drizzais il meglier a Voss purschider per vegnir a savair, co ch'il filter funcziuna e nua ch'el po vegnir activà.
La broschura d'infurmaziun dal Secretariat da stadi per l'economia (SECO) dat cussegls utils e declera, tge che Vus pudais far cunter telefonats da reclama nungiavischads.
Ruaus da telefonats da reclama nungiavischads