Taxa da radio e televisiun
Tut las chasadas svizras sco er las interpresas e las chasadas collectivas pajan da princip ina taxa da radio e televisiun. Per l'obligaziun da pajar la taxa na dependi betg, sch'i èn avant maun apparats che pussibiliteschan la recepziun da programs da radio u da televisiun (apparats da radio u da televisiun, smartphone, tablet u computer cun access a l'internet).
En Svizra datti adina dapli attatgas da phishing. Il phishing è ina furma d’engion online, tar il qual ils attatgaders sa dattan or per represchentants d’ina instituziun enconuschenta per obtegnair datas persunalas u finanzialas u per incitar da far transacziuns finanzialas. Er las clientas e clients da l’organ d’incassament svizzer per la taxa da radio e televisiun SERAFE SA pon esser pertutgads. Impurtant da savair: la SERAFE SA na trametta nagins e-mails cun links che mainan sin paginas d’internet, sin las qualas ins sto endatar datas, ed ella na supplitgescha er betg da far pajaments sur apps sco Twint.
- Las chasadas privatas pajan dapi il 1. da schaner 2021 335 francs per onn.
- Las chasadas collectivas pajan dapi il 1. da schaner 2021 670 francs per onn.
- Las interpresas pajan ina taxa ch'è dependenta da la svieuta.
- Il Departament federal per ambient, traffic, energia e communicaziun (DATEC) è incumbensà da controllar las tariffas da taxa mintga 2 onns. L'onn 2020 ha l'emprima controlla permess da reducir la taxa per chasadas privatas per 30 francs per onn e per chasadas collectivas per 60 francs per onn.
- La taxa serva per sustegnair la SSR, ma er emetturs da radio e da televisiun locals concessiunads. Quests emetturs ston furnir tschertas prestaziuns per garantir in service public d'auta qualitad en Svizra.
Contact
UFCOM
Centrala:
Tel. 058 460 55 11
Sectur taxa da chasadas:
Tel. 058 460 55 32
SERAFE AG
Tel. 058 201 31 67
Contact Serafe
www.serafe.ch