Tgi è responsabel per tge?
L'Uffizi federal da communicaziun (UFCOM)
- attribuescha ils numers da 09x individualmain a persunas ed ad interpresas;
- publitgescha ils nums e las adressas da las titularas e dals titulars da quests numers sin la pagina d'internet
- surveglia l'observaziun da las prescripziuns per il diever da quests numers;
- po revocar numers da 090x attribuids e laschar metter ord funcziun tals, cunzunt sche
- las disposiziuns decisivas per il manaschi ed il diever na vegnan betg observadas (pertutga cunzunt cuntravenziuns cunter las disposiziuns da l'Ordinaziun davart la publicaziun dals pretschs, la preschentaziun dals numers u l'elecziun da la categoria da numers);
- in'autra autoritad constatescha en ses champ da cumpetenza la violaziun dal dretg federal u il suspect d'ina tala;
- po refusar l'attribuziun d'in numer ad ina persuna u ad ina interpresa, cunzunt sch'il suspect da l'utilisaziun abusiva exista;
- procura che la protecziun da las consumentas e dals consuments vegn meglierada en quest sectur.
Il UFCOM na po betg
- intervegnir tar dispitas davart in quint;
- sustegnair las consumentas ed ils consuments activamain, sch'ellas ed els contestan in quint;
- revocar in numer, sche la basa giuridica manca;
- giuditgar il cuntegn dals servetschs prestads sur ils numers da 090x, ni la confurmitad legala ni la qualitad u la relaziun tranter pretsch e prestaziun;
- pronunziar ina sentenzia en cas d'abus, ch'èn chaussa da las autoritads giudizialas da dretg civil e da dretg penal;
- intervegnir tar ina titulara u in titular d'in numer internaziunal.
La rolla da Vossa purschidra (purschidra da servetschs da telecommunicaziun)
- Vossa purschidra è responsabla per As metter a quint Voss telefons sin numers da 090x. Per sia activitad d'incassament survegn la purschidra ina tscherta part da l'import mess a quint.
- Sch'ina purschidra ha il suspect motivà, ch'in numer da servetschs 090x cun plivalur cuntrafa a las reglas vertentas e ch'igl è necessari d'impedir svelt in grond donn, po ella bloccar quest numer per maximalmain 4 lavurdis. En quest cas sto vegnir infurmà il UFCOM che controlla lura las mesiras adattadas.
La rolla da las titularas e dals titulars da numers
La possessura u il possessur d'in numer da 090x ha survegnì quel dal UFCOM per far diever da tal. Ella decida il cuntegn ed ensemen cun la purschidra il pretsch che vegn mess a quint a la persuna che telefonescha. Ella è responsabla per observar las disposiziuns giuridicas, er sch'ella na furnescha betg sezza la prestaziun.
Post da mediaziun ombudscom
El intermediescha tranter clientas e clients e purschidras da dretg da telecommunicaziun e da servetschs cun plivalur svizras en cas da dispitas da dretg privat, che questas partidas na pon betg schliar en moda cuntentaivla ina cun l'autra.