Tgi na paja betg?
Persunas che retiran prestaziuns supplementaras
- Sin dumonda vegnan las persunas, che retiran tar la renta da la AVS u da la AI ina prestaziun supplementara annuala (PS) da la Confederaziun, deliberadas da l'obligaziun da pajar la taxa. La liberaziun vala a partir dal mument da la retratga da las prestaziuns supplementaras, per maximalmain 5 onns enavos, dentant betg retroactivamain per il temp avant l'onn 2019.
- Per tschentar ina dumonda, sto vegnir inoltrada la brev da conferma dal post executiv davart la retratga da las prestaziuns supplementaras a la Serafe.
- Sch'ina commembra u in commember d'ina chasada privata vegn liberada u liberà, scroda l'obligaziun da pajar la taxa per tut las abitantas e tut ils abitants da la chasada respectiva. En il sectur da las persunas che retschaivan prestaziuns supplementaras vala la liberaziun per almain 3 onns. Suenter sto l'organ d'incassament examinar, sche las premissas per ina liberaziun da la taxa èn anc dadas.
- Ina liberaziun da persunas che retiran prestaziuns d'agid social n'è betg previs, perquai che l'agid social resguarda la taxa en l'import da basa. Rabats u relaschs na pon betg vegnir concedids.
- Basas legalas: artitgel 69b alinea 1 litera a ed alinea 2 da la Lescha federala davart radio e televisiun (LRTV; CS 784.40) ed artitgel 61 alinea 1 da l'Ordinaziun davart radio e televisiun (ORTV; CS 784.401)
Diplomats
- Tenor la Lescha federala davart radio e televisiun (LRTV; artitgel 69b alinea 1 litera b LRTV; CS 784.40) vegnan liberadas da la taxa las persunas che giaudan privilegis, immunitads e facilitaziuns tenor l'artitgel 2 alinea 2 da la Lescha dals 22 da zercladur 2007 davart il stadi ospitant (LSO) e che han il status da diplomat, premess ch'ellas na sajan betg burgaisas svizras; il Cussegl federal regla la dispensaziun d'ulteriuras persunas che giaudan privilegis, immunitads e facilitaziuns e che appartegnan al persunal dals benefiziaris instituziunals tenor l'artitgel 2 alinea 1 literas d, e ed f LSO, premess ch'ellas na sajan betg burgaisas svizras.
- Liberads da l'obligaziun da pajar la taxa èn tenor l'Ordinaziun davart radio e televisiun (ORTV; artitgel 61 alinea 3 litera a, b, e c ORTV; CS 784.401)
- a. il persunal diplomatic, ils funcziunaris consulars, il persunal tecnic e da l'administraziun sco er il persunal da servetsch da las missiuns diplomaticas, da las missiuns permanentas u d'autras represchentanzas tar organisaziuns internaziunalas e dals posts consulars manads da funcziunaris consulars professiunals, sch'els han ina carta da legitimaziun dal Departament federal d'affars exteriurs (DFAE) (cartas da legitimaziun tip B, C, D, E, K cotschen, K blau u K violet) e sch'els n'han betg la naziunalitad svizra;
- b. las commembras ed ils commembers da la direcziun auta (carta da legitimaziun tip B) sco er autas funcziunarias ed auts funcziunaris (carta da legitimaziun tip C) dals benefiziaris instituziunals che han fatg ina cunvegna da sedia cun il Cussegl federal, sch'els han il status da diplomat, han ina carta da legitimaziun dal DFAE e n'han betg la naziunalitad svizra;
- c. las persunas autorisadas d'accumpagnar ina persuna tenor litera a u b cun il medem status sco la persuna accumpagnada, sch'ellas n'han betg la naziunalitad svizra.
Chasadas cun persunas surdtschorvas
- Chasadas, nua che mo persunas surdtschorvas vivan, n'èn betg suttamessas a l'obligaziun da pajar la taxa.
- Per sa liberar da la taxa sto vegnir inoltrà a Serafe ina dumonda e la copia d'in attest dal medi.
- Basa legala: Artitgel 61 alinea 2 da l'Ordinaziun federala davart radio e televisiun, (ORTV; CS 784.401)
Persuna cun il domicil principal a l'exteriur e senza domicil secundar en Svizra
- Ina persuna che ha ses domicil principal a l'exteriur e che n'ha nagin domicil secundar en Svizra, q.v.d. ina persuna ch'è en vacanzas en Svizra, na sto betg pajar la taxa.